A revista Extravío publica un número sobre BD e ilustración

A banda deseñada e a ilustración protagonizan o último número da revista Extravío, dedicada á literatura comparada. Entre os seus contidos, atopamos un amplo artigo sobre a obra Trazo de xiz, de Miguelanxo Prado. O texto, a cargo de Antía Marante, filóloga da Universidade de Santiago, analiza a intertextualidade e a metaficción nesta historia. O artigo íntegro está dispoñible no web da revista.

Os músicos ao vivo reúnense para crear unha plataforma

Os artistas que se dedican á música en directo no noso país teñen unha cita o vindeiro domingo ás 17:00 horas no Auditorio de Galicia. O encontro pretende crear unha "plataforma de intercambio de información e opinión" e desenvolver unha Asociación Galega de Músicos ao Vigo que outorgue unha voz común ao colectivo. A iniciativa pretende abranguer tanto afeccionados coma profesionais que teñan coma nexo común o tocar en directo.

Un novo manifesto a prol da lingua suma adhesións na rede

Continúan as iniciativas sociais de apoio á nosa lingua. O manifesto Galego. Patrimonio da Humanidade reclámalle ao goberno da Xunta que volte ao consenso nas medidas lingüísticas e que desenvolva medidas de protección para garantir a igualdade co castelán. Pola súa banda, a Mesa pola Normalización convocou unha xuntanza na galería Sargadelos para o vindeiro 7 de xullo ás 17 horas. O encontro pretende ser a base para constituir unha plataforma social en defensa do noso idioma. Entre outras medidas, a Mesa adianta a posibilidade de promover unha iniciativa lexislativa popular que garanta o dereito a vivir en galego.

A Deputación de Lugo achegará actividades aos concellos da provincia

A práctica totalidade dos concellos de Lugo contarán con actividades culturais dentro do programa Cultura Aberta nos concellos que se desenvolve entre xullo e agosto. A iniciativa da Área de Cultura da Deputación de Lugo inclúe as xiras de Peter Punk, proxeccións audiovisuais en A caixiña dos mistos e mais ilusionismo en Maxia nas Comarcas. Canda a esta proposta, a Deputación programa co título de Cultura Aberta nos xardíns actividades de ocio nos xardíns do edificio deste organismo.

Coanhadeira presenta o seu primeiro disco Haique

Cunha festa- concerto no Café Grándola de Ourense celebrará o grupo Coanhadeira este sábado a saída do seu primeiro disco HAIQUE. A formación inicia tamén con esta actuación a xira de presentación deste traballo que xa ten 18 concertos fechados para este verán. O grupo está formado por Patrícia López, voz e pandeireta; Xerardo Quintela, acordeón; Xesus Pérez ”Chechu”, gaitas, whistle e zanfona; Marco Pérez, batería e percusións; Óscar Freire, gaitas e saxos e Fran X. Gómez, clarinete e guitarra. Xurde primeiro como grupo de “gaiteiros”, partindo dunha base eminentemente tradicional e baseándose na recollida da tradición musical popular. HAIQUE recolle o principal do repertorio do grupo dende a súa formación, con renovacións de arranxos nalgún caso, e conta coas colaboracións de Guadi Galego e Fonso “Skarnio”. O grupo está detrás de todos os procesos que levaron a sacar HAIQUE, dende a pre-produción, a idea orixinal ( plasmada por Heitor Real), até a mestura e seguramente a distribución. Asemade Coanhadeira xa está a preparar os temas do que será o seu segundo traballo, con data prevista de saída a comezos do 2010.

Unha xornadas lembran a Raymundo Ibáñez

Antonio Raymundo Ibáñez, Marqués de Sargadelos, marcou un antes e un despois na historia de Galicia. Entre os vindeiros días 13 e 15 deste mes os concellos de Santalla de Oscos, en Asturias, Sargadelos e Cervo rememoran a figura deste ilustrado nun evento que analizará a súa vida, obra e contexto. O evento tratará cuestións coma a realidade e a ficción na figura de Ibáñez, a siderurxia tradicional, as arquitecturas que promoveu este empresario ou os afrancesados galegos, con intervencións a cargo de Ramón Villares, Alfredo Conde, Clodio González Pérez ou Fausto Dopico entre outros.

O Festival dos Abrazos volta ás rúas de Compostela este verán

Un concerto da Real Filharmonía de Galicia na praza da Quintana abrirá a segunda edición do Festival dos Abrazos, que se celebrará en Compostela durante todo o mes de agosto. A proposta multidisciplinar achegará 150 propostas artísticas tanto de creadores locais coma internacionais. Cada semana artellarase dedicándolle cada día a un tipo de expresión. Arte experimental luns, trovadores martes, piano mércores, música de raíz xoves e obradoiros e arte dixital nas fins de semana organizan o programa. Ademais, clown, maxia, audiovisual e artes plásticas distribuiranse de xeito transversal ao longo do mes. Entre as propostas que se poderán ver na cidade están o Stckholm Lisboa Project, o Kora Jazz Trio, Oreka TX ou a Orquestra Chekara. A Orquestra Sinfónica e o Coro de San Petersburgo participarán tamén no evento os días 18 e 19 de agosto.

A banda Invivo presenta o seu primeiro disco Introvisión

A banda compostelá de metal cru INVIVO edita coa empresa valenciana Producciones Malditas o seu primeiro longa duración, INTROVISIÓN. O disco físico aparece distribuído en tendas por Lonxa Cultural e en formato dixital a través de Maldito Digital. Consta de 13 temas propios gravados e mesturados por Yago Pico en Pousada Son Studios de Ames e masterizados por Peter In de Betou en Tailor Maid Studios de Suecia . O grupo gañou recentemente o III Festival Millarock conta con outras gravacións anteriores para os discos colectivos Apostolocausto (2007) e Derrameidea (2008). Invivo formouse a primeiros de 2006 polos músicos veteranos da escena metal e rock galega Ricardo González (batería), Mario César (voz e guitarra), Roberto Couto (guitarra) e Roberto Filgueira (baixo e coros).

A Xunta realizará unha intervención nos espazos públicos do Camiño de Santiago

Un convenio entre a Xunta e o Ministerio de Fomento permitirá abordar a recuperación dos espazos públicos do Camiño de Santiago a cargo do 1% cultural. O proxecto, que presentou esta mañá o presidente da Xunta, Alberte Núñez Feijóo, investirá 2 millóns de euros en iniciativas de adecentamentos de prazas, lavadoiros e outros elementos situados nas proximidades da Ruta Xacobea. Ademais, abordaranse tarefas de conservación en 12 carballeiras e destinaranse axudas á recuperación de casas, cruceiros, hórreos e bens patrimoniais. Segundo Feijóo, o programa cubrirá polo momento doce concellos polos que transcorre o Camiño Francés, aínda que se prevé a súa ampliación a outras rutas no futuro.

Juan Carlos Fernández Fasero é o novo director de AGADIC

O Consello da Xunta deste xoves oficializou o nomeamento do novo director da Axencia Galega das Industrias Culturais. O músico Juan Carlos Fernández Fasero será o responsable de AGADIC substituíndo a Miguel Martín. Fasero é membro do grupo folk Mutenrohi, ademais de ter publicados varios discos en solitario. Ademais, é creador do selo discográfico Zouma Récords e responsable do estudio de gravación Desfase Sound. Fasero é tamén secretario de AGAPHONO (Asociacion Galega de Fonograficas) e vicepresidente de AGEM (Asociación Galega de Empresas Musicais) ademais de formar parte da corporación municipal de Arnoia polo Partido Popular.

A Coruña acolle o festival de danza Empape

O festival de danza Empape é unha iniciativa de baile nada en Barcelona. A iniciativa leva por cidades de todo o mundo espectáculos coreográficos que se desenvolven en rúas e prazas e, por segundo ano consecutivo, fai parada na Coruña. Lugares coma a Domus, a Torre de Hércules ou o Castelo de Santo Antón, acollerán desde mañá e ata o vindeiro domingo actuacións de artistas coma Pita Castro, o Centro Coreográfico Galego, David Loira ou a Compañía Sacude entre outros.

David Rubín protagoniza o novo número da revista El Manglar

O décimo número da revista madrileña El Manglar, da editorial Dibbuks, conta cun protagonista galego. David Rubín é o responsable da capa desta entrega, e ocupa tamén as páxinas centrais cunha entrevista. Ademais, a revista publica a historia de doce páxinas que o ourensán realizara para a antoloxía PopGun, de Image Cómics.

Viaxes para contar

Quedou impresionada polas paisaxes do que chamou Coast of Death, a presenza das mulleres no mundo da pesca, e a forma de vida dos galegos. Ruth Mathilde Anderson documentou todo ese percorrido coa sua cámara de fotos e un caderno de notas que repousaron nos sotos da Hispanic Society of America, a entidade que sufragou as súas viaxes, ata agora. Miguel Anxo Seixas Seoane e Patrick Lenaghan rescataron esas imaxes para unha exposición que presenta a Fundación Caixa Galicia.

Unha exposición recolle as fotografías realizadas por Ruth Matilda Anderson nos anos vinte

En 1924 Ruth Matilda Anderson desembarcaba en Vigo cun obxectivo moi claro: describir e fotografar a realidade española do momento. Era o encargo da Hispanic Society of America, a centenaria institución cultural que editaría despois o libro de viaxes que Anderson realizou. O resultado dese traballo, do que hai máis de 5.000 imaxes, poderase ver este ano da man da Fundación Caixa Galicia en dúas exposicións. A primeira delas abre mañá a súas portas en Lugo, desde onde itinerará por varias sedes da entidade, e na que se seleccionan 164 imaxes que recollen a ollada documental da coñecida fotógrafa. A segunda exposición terá lugar na Coruña a mediados de outubro, que será cando se exhiban, por primeira vez, preto de 500 imaxes que retratan a Galicia dos anos vinte. Miguel Anxo Seixas e Patrick Lenaghan son os comisarios deste proxecto que comezou hai case dous anos no soto da sede neoiorquina da Hispanic Society of America.

O XXV Festival de Ortigueira achegará unha vintena de concertos

A edición XXV do Festival Internacional do Mundo Celta de Ortigueira achegará a esta vila unha vintena de concertos entre 9 e o 12 de xullo. Segundo explicou o director do evento, Alberto Balboa, o festival "volta ás orixes musicais”, centrándose en música atlántica. Michael McGoldrick band, Battlefield band, Wolfstone, Fred Morrison, Xosé Manuel Budiño, Susana Seivane, o grupo Arán e mais os concertos do escenario Runas compoñen o cartel. Canda aos directos está prevista a celebración dunha exposición fotográfica sobre a historia do festival, obradoiros de folclore a cargo de Mercedes Peón ou pasarrúas entre outras propostas.

O IX Congreso Internacional de Estudos Galegos achégase por primeira vez ao país

Por primeira vez, o Congreso Internacional de Estudos Galegos celebrarase no noso país. Tres anos despois da edición de São Paulo, a IX entrega deste encontro de investigadores da nosa cultura terá lugar en Compostela, Vigo e A Coruña entre os días 13 e 17 de xullo. Segundo explicou o presidente da Asociación Internacional de Estudos Galegos, Burghard Baltrusch, o evento terá como eixe Galicia nos Contextos Globais: Perspectivas para o Século XXI, e acollerá 27 mesas redondas, catro conferencias plenarias e 79 relatorios. En total, prevese a asistencia dun 250 investigadores de diferentes países, dos que preto da metade chegan de universidades foráneas.

Mugardos e Keresú publican un disco en galego e guaraní

Coa intención de establecer un diálogo musical entre dúas linguas minoritarias o galego Xavier Mugardos e a arxentina Natalia Carossi "Keresú", publican Cantos das dúas beiras, o primeiro disco gravado en galego e na lingua guaraní da comunidade indíxena amazónica. O traballo conxunto dos dous músicos presenta once cancións, sinxelas pero fermosas, construídas con dúas guitarras e a cálida voz de Keresú. O disco foi gravado co mesmo son que o dúo presenta nos seus directos para reivindicar a música como un traballo artesán sen intervención das máquinas.

Descarga ao vivo fusionará a música cubana e a galega

A Central Folque está a coordinar a xira galega do proxecto Descarga ao vivo, que mestura música galega e cubana. A iniciativa, que se presentou na Habana en febreiro de 2008, chega ao noso país con tres concertos que se celebrarán na Coruña (23 de xullo), en Compostela (25 de xullo) e en Vigo (30 de xullo). Os espectáculos contarán coa presenza de músicos dos dous países, coma Guadi Galego, Quim Farinha, Ugia Pedreira, Oscar Fdez., Xabier Díaz, Edelmiro Fdez., Pablo Castanho, Pablo Pascual, Gutier Álvarez, Raciel Jiménez, Adonis Ríos e J.M. Díaz. A organización puxo en marcha un concurso de fotografías de época no que se repartirán dez entradas.

Martín Romero gaña a bolsa Alhóndiga Bilbao de banda deseñada

Un ano de residencia en Angoulême, con acceso aos recursos da prestixiosa Maison des Auteurs e mais unha paga mensal para desenvolver un proxecto de banda deseñada. Estes son os apoios que acaba de conseguir o galego Martín Romero ao imporse entre os 40 participantes na bolsa Alhóndiga Bilbao. Romero fora galardonado co primeiro premio do certame GZ Crea de 2008 e colaborou con diferentes fanzines e publicacións nos últimos anos.