Pablo Iglesias presenta a súa longametraxe Pedro e o capitán

Rodada en galego, en formato dixital e con só dous actores, Pablo Iglesias estreáse na dirección con Pedro e o capitán. A longametraxe estréase hoxe no Auditorio da Aula SocioCultural da Fundación Caixa Galicia, en Santiago de Compostela, ás 20:30 horas. Está baseada na obra homónima de Mario Benedetti e narra o diálogo imposible dun militar torturador e un preso político torturado nunha sala de interrogatorios. É a historia dun conflito que vai máis alá do meramente ideolóxico.

Recreacións e testemuños mestúranse en Flores Tristes, o documental sobre a represión en Galicia

Os foxos das estradas son lugares nos que acostuman a nacer unha gran variedade de flores. Pero tamén son os espazos nos que foron fusilados, asasinados e paseados moitos galegos durante a posguerra. Por iso, Teo Manuel Abad púxolle por título Flores tristes ao documental que fixo sobre a represión en Galicia. Unha historia que mestura testemuños de víctimas represaliadas con recreacións dalgúns dos episodios mais dramáticos da historia recente. A película estreáse o venres 21 (Teatro Principal, 21:45 horas), no marco de Cineuropa, o festival de cine independente e social do Concello de Santiago.

Antonio Blanco é o novo delegado de Cultura en Ourense

Quince días despois de que Xosé Carlos Sierra cesara como delegado de cultura en Ourense para ocupar o cargo de secretario xeral dese departamento, o consello da Xunta acordou hoxe o seu substituto. Trátase de Antonio Blanco Rodríguez (Allariz, 1951), licenciado en Historia da arte e autor de publicacións relacionadas coa etnografía e o turismo. No seu currículo destaca a implicación no desenvolvemento de proxectos como o Museo Iconográfico Aser Seara, o Museo Galego do Xoguete, no seu tempo de concelleiro en Allariz, ou nas fundacións Ramón González Ferreiro ou a Vicente Risco.

43 liñas eléctricas desaparecerán da paisaxe galega

O investimento de 5.552.548 euros permitirá que se soterren 43 liñas eléctricas xestionadas por Unión Fenosa. O titular de Industria, Fernando Blanco, asinaba esta mañá un acordo con Luís Díaz, director xeral da compañía en Galicia, para abordar o ocultamento destes cables, que desaparecerán da paisaxe de concellos coma Lousame, Mugardos, Oleiros, Cotobade, Sanxenxo, Pontevedra, O Porriño ou A Rúa entre outros. Segundo indica Industria, estas actuacións favorecen a seguridade "para as instalacións, as persoas ou os bens de interese cultural e ambiental" ademais de eliminar o impacto paisaxístico dos tendidos.

Nace Europeana, a biblioteca en liña europea, con escasa presenza da cultura galega

Hoxe preséntase na Biblioteca Nacional de Bélxica, en Bruxelas, Europeana, o portal bibliotecario en liña da Unión Europea. Un proxecto que conta con recursos como textos, imaxes, vídeos e sons. Nela pódense consultar desde partituras orixinais de Mozart ata obras de Ramón Llul. Malia contar coa colaboración da Xunta de Galicia (a través da Biblioteca Dixital) e estar noutras linguas como o catalán, Europeana non está en galego e conta con escasos recursos da nosa cultura. Textos en castelán de Murguía, crónicas do século XIX, algúns mapas, fotografías do Camiño de Santiago ou o libro de José Villa-Amil sobre prehistoria son algúns dos 97 fondos que se localizan buscando Galicia no web. A Consellaría de Cultura asegura que desde a Biblioteca Nacional enviáronse documentos para este proxecto.

Tres galerías e dúas revistas participan na feira de arte contemporánea ArtLisboa

Hoxe comeza en Lisboa a feira de arte contemporánea más destacada de Portugal. Un encontro no que están presentes as galerías Ad Hoc, Bacelos e Marisa Marimón no programa xeral, xunto coas revistas Art Notes e Dardo. Malia que a feira abre hoxe para o público en xeral, foi onte cando tivo lugar a apertura para profesionais. Ademais do apartado de exhibicións, o encontro conta cunha serie de foros de debate sobre o investimento en arte e a actualidade mundial deste tipo de citas.

Caixanova propón dúas actividades para se introducir na creación literaria

O traballo literario a través dos escritores é o título do curso de literatura que comeza hoxe no Espazo Literario Caixa Nova, en Vigo. Yolanda Castaño abrirá as sesións coa clase Escribir poesía no século XXI. Ampliar a profundidade de campo. canda a ela, autores coma Antón Reixa, Rubén Ruibal, Ramón Nicolás ou Cesáreo Sánchez iglesias impartirán cadansúa charla ata o vindeiro 21 de maio de 2009. A cita é hoxe ás 20h da tarde no Centro Social Caixanova de Vigo. A mesma Fundación anuncia para a Coruña a celebración dun taller de creación literaria entre os meses de decembro e xaneiro da man do escritor Francisco Castro.

Cada galego gasta ao ano 270 euros en cultura

O Ministerio de Cultura acaba de facer público a última edición do seu anuario estatístico, é dicir, o documento que contén as cifras máis completas sobre o sector cultural. Entre os datos, desglosado en case todos os capítulos por comunidades autónomas, franxas de idade e xénero, destaca que o gasto medio por habitante en Galicia ascende a 270.6 euros. A cifra está lonxe dos 168 euros que se gastaban no 2006 pero Håkan Casares, coordinador do Observatorio da Cultura Galega, afirma que o incremento da cifra se debe principalmente a “un cambio de metodoloxía que incorpora máis variables e unha mostra máis representativa”, pero que confirma a tendencia á alza no gasto cultural.

El Patito adianta os seus vindeiros lanzamentos

O venres 21 de novembro El Patito Editorial celebra o seu primeiro aniversario coa presentación de Aventura no camiño de Santiago de Primitivo Marcos. Desde a empresa adiantan ademais un bo feixe de proxectos para os vindeiros meses. Para comezar, a finais deste mesmo ano porán á venda en formato DVD o documental 35 anos de historieta galega que realizaran a pasada primavera. Para comezos do vindeiro ano sairán as anunciadas edicións de As dúas viaxes de Xaquín Marín e mais a versión galega de Stratos, de Miguelanxo Prado. A editora adianta a súa intención de publicar un novo título deste autor ao longo do vindeiro ano. Canda a el, Miguel Calatayud e mais Fran Bueno (dentro da colección Clásicos da historieta galega) sumaranse á nómina de creadores da editorial. Para rematar, a firma sinala que prepara “novos títulos dos autores da casa” e mais “unha colección infantil ilustrada integramente por autores galegos” da que non especificaron se acollerá BD ou libro ilustrado.

Botero protagoniza a capa do suplemento cultural de A Peneira

Kalaikia, o suplemento cultural do xornal A Peneira, chega ao número 26 outorgándolle o protagonismo da súa capa á exposición de Fernando Botero sobre Abu Ghraib. Unha entrevista con Forges, Cineuropa, Peque Varela ou Few Days Later son outros dos focos nos que se centra esta publicación. Este número, canda aos anteriores, está dispoñible en formato pdf no web de A Peneira.

Outras formas de contar contos

Non é un contacontos pero tampouco un musical nin un monólogo. É un xénero a medio camiño no que xa traballaron o premio Nobel Darío Fo ou mesmo El Brujo. Cándido Pazó chámalle “narración escénica” porque fixo o seu achegamento desde o teatro, mentres que Carlos Blanco partiu da música. Son os xéneros híbridos nos que os creadores galegos se moven con forza.

Lino Braxe: “A intención da Velada foi recuperar catro pezas que tratan temas moi presentes na nosa vida”

No marco do programa que conmemora o nacemento de Jenaro Marinhas del Valle (1908-1999), Teatro Proscrito estrea mañá A Velada. A montaxe dirixida por Lino Braxe recupera os textos de catro obras (Acurrados, Pai descoñecido, O triángulo ateo e Home frouxo) escritas polo autor nos anos corenta, aínda que cunha temática totalmente contemporánea como os malos tratos, os totalitarismos ou o machismo. A montaxe, no que a música en directo ten grande importancia, estreáse no Teatro Rosalía de Castro (A Coruña), o venres 21 ás 20:30 horas.

Imaxin presenta o tradutor en liña entre galego e inglés

A ferramenta Opentrad, que permite a tradución de textos e documentos entre diferentes idiomas ten xa na rede un prototipo do que será o primeiro tradutor automático entre galego e inglés. O proxecto, desenvolvido pola empresa Imaxín, permite facer conversións entre estas dúas linguas, nas dúas direccións, e o seu código abrirase á comunidade para que os interesados poidan colaborar no desenvolvemento e mellora desta iniciativa.

A Real Academia dixitaliza os seus fondos

A conselleira de Cultura, Ánxela Bugallo e o presidente da Real Academia Galega, Xosé Ramón Barreiro, asinaban esta mañá o convenio para dixitalizar os fondos da RAG. O proxecto será financiado pola Fundación Cidade da Cultura con 149.000 euros e pretende pór a disposición de todos os interesados os fondos desta institución nun prazo de dous anos. O material dixitalizado será accesible a través de Internet ademais de nas instalacións da Real Academia e do Arquivo Nacional. Esta actuación enmárcase no Programa de Dixitalización de Fondos Documentais e Bibliográficos Galegos que encabezan a Biblioteca e o Arquivo Nacional. A intención deste proxecto e dixitalizar os principais fondos culturais do noso país para formar o Fondo Dixital da Cultura Galega.

O Centro Coreográfico explora coa danza o universo feminino na súa última montaxe

No marco das coproducións con compañías independentes e empresas de titularidade privada, o Centro Coreográfico Galego estrea mañá en Galicia(Teatro Jofre, 20:30 horas) Feminine. Xurdida da colaboración coa compañía portuguesa Paulo Ribeiro, a montaxe pescuda o universo do poeta Fernando Pessoa a través da ollada de cinco bailarinas. As galegas Olalla Pérez e Andrea Álvarez Pino estiveron inmersas no proceso de creación deste espectáculo como asistentes de dirección e axudantes de produción respectivamente. Despois da súa estrea en Ferrol, Feminine poderase ver ata abril de 2009 en distintos escenarios de Galicia e Portugal, ademais de participar no Festival New Territories de Glasgow (Escocia).

Comezan os estudos dos territorios para delimitar a Vía da Prata

Primeiro estudáronse os trazados dos camiños Francés, o do Norte, o Primitivo; xa están en marcha os do Inglés, Portugués e Fisterra-Muxía e agora, a Consellaría de Cultura acaba de adxudicar os estudos da Vía da Prata. Deste xeito complétase o Plan de Delimitación e Protección dos Camiños que desenvolve a Consellaría de Cultura. En total destínanse 840.000 euros para realizar a análise previa necesaria coa que elaborar a proposta de delimitación do trazado dos camiños e das zonas de protección que van a Santiago desde Chaves e Ourense.

A Coruña e Vigo estrean este venres o último filme de Manane Rodríguez

Os retos, as dificultades e as peculiaridades da adopción de Olivia, unha nena latinoamericana de 6 anos, é o que recolle a última película de Manane Rodríguez. O filme, Un conto para Olivia chega ás carteleiras este venres. A produción chegará con dúas copias en galego: unha en Vigo (Cines Norte) e outra na Coruña (Cines Filmax).

Comeza a xira de presentación de Cuimhne

Kike Benlloch e José Domingo comezan este venres na Coruña a xira de presentacións de Cuimhne. El fuego distante, a obra que acaban de publicar coa editora mallorquina Dolmen. Ferrol acolle a segunda destas presentacións, onde os autores asinarán exemplares da súa obra e os asistentes poderán conseguir o volume antes da súa distribución oficial, que segundo a editora comezará a vindeira semana.

A revisión dos fondos do Quiñones de León cuantifica as pezas en 16 millóns de euros

Alberga obras como A misa de Parida de Goya, A virxe e o neno atribuída a Rubens ou A habitación do vello mariño de Lugrís (valorada en 200.000 euros), aínda que sexa un museo pouco coñecido. O Quiñones de León está inmerso na catalogación e revisión da taxación da súa colección de arte, que a día de hoxe ascende a 11.5 millóns. As estimacións auguran que cheguará aos 16 millóns, o dobre que no 2000, data da última taxación. Ademais, de xeito paralelo a estes traballos estanse a mellorar os sistemas de seguridade deste centro. A gran cantidade de fondos que presta este centro para exposicións foi o que levou ao seu director, José Ballesta, a revisar a taxación e catalogación.

Galegos participan na I Primeira Convención da Industria do Cómic

SET de Cómic, a I Primeira Convención da Industria do Cómic é o título do encontro que reunirá en Lleida esta fin de semana profesionais de todo o Estado. O evento pretende ser un centro de debate encol do sector afastado de públicos e de medios. Entre os asistentes galegos atopamos a Víctor Rivas, que se encarga da dirección de arte deste evento. Ademais, desprazaranse a Lleida o debuxante Kiko da Silva e mais os responsables das librarías Norma, de Vigo e Alita Cómics, da Coruña.