Artistas: Vari Caramés, José Caruncho, Xurxo Lobato, Tino Martínez, Eduardo Ochoa e Xoán Piñón.
Percorrido polo patrimonio arquitectónico e artístico do barroco galego, a través da ollada fotográfica de seis autores contemporáneos que nos amosan a súa visión da arte galega do século XVIII: os coruñeses José Caruncho, Xurxo Lobato, Xoán Piñón e Vari Caramés, xunto co compostelán Tino Martínez e o lucense Eduardo Ochoa.
O resultado é unha demostración da convivencia entre a literatura, a fotografía e o deseño arquitectónico actual, xunto coas esculturas e a arquitectura dunha sociedade barroca antiga cuxas manifestacións artísticas seguen a configurar o noso espírito, as nosas cidades, as nosas crenzas e, por suposto, a nosa arte contemporánea actual. Así, os mosteiros de Samos, Monfero, Oseira, San Breixo de Berán, Beade ou Sobrado dous Monxes son algúns dos monumentos sobre os que estes fotógrafos galegos puxeron a súa mirada, ademais do de San Martín Pinario ou a catedral de Santiago.
As tres condicións fundamentais para a creación das composicións de Cámara Barroca foron: manter o protagonismo das obras fotográficas expostas; achegar elementos de interese ás intencións xerais da proposta; e, subliñar a contemporaneiade da reflexión creativa, a través do vínculo co espírito do barroco.
Estes seis fotógrafos utilizan o reflexo como motivo central do deseño, onde as visións devoltas polas superficies pulidas e brillantes trazan unha complexa liña de conexión dende o barroco ata a modernidade: do rostro da Venus velazqueña, pasando pola rúa do Gato valleinclanesca, ata o vidro e o aceiro cromado das obras de Mies van der Rohe.
A exposición, comisariada por Fernando Agrasar, está organizada polo Museo de Belas Artes da Coruña xunto coa Consellería de Cultura e Turismo, e conta coa edición dun catálogo coas 120 fotos realizadas polos artistas. A publicación prolonga a idea dos recursos gráficos sobrios, tinta prateada, e unha portada de material reflectante sen imaxes.
Fonte: Museo de Belas Artes da Coruña
