Baixo o título Nadar, Vari Caramés presenta unha selección de fotografías que teñen o denominador común dos corpos de nadadores, homes e mulleres, novos e vellos, anónimos e amateurs, en diferentes composicións que reflicten as súas evolucións dentro da auga, en piscinas ou praias, en momentos de lecer ou de exercicio físico, sobre o ras ou mergullados, mesmo coa presencia de elementos arquitectónicos ou das paisaxes circundantes.
As imaxes, unha escolla temática e representativa dentro da produción e traxectoria do fotógrafo ferrolán afincado na Coruña, aparecen presentadas en branco e negro sobre papel de algodón, e manteñen a fidelidade á estética de fabulación esvaída, de instantánea movida e vocación lúdica, que caracteriza o traballo de Vari Caramés.
Fonte: Atalaia
