MeGA | Música en Galicia

Información

Xéneros

Multimedia

Destacado

O debú en solitario de Guadi Galego gaña os IX Premios Opinión de música folk

Xénero: Folk 1 / 3 / 2010

Gañouno co grupo Berrogüetto, o trío Nordestin@s, o dúo Espido e agora coa súa nova aposta en solitario. O traballo Benzón de Guadi Galego acaba de gañar o IX Premio Opinión. A artista obtivo na votación do xurado 18 puntos, cos que se impuxo a Cuarteto Caramuxo e a Nova Galega de Danza, que conseguiron un empate (11 puntos). O premio do xurado, formado por críticos musicais, é puramente honorífico, xa que non ten dotación económica.

O Festival Mozart inicia unha nova etapa con Oriol Ponsa como director

Xénero: Clásica | 15 / 3 / 2010

Paolo Pinamonti chegou ao Festival Mozart no ano 2008 para imprimirlle un novo aire ao certame máis centrado na dirección de escena. Sen embargou, esa filosofía ten os seus días contados. O certame, que comeza o vindeiro 8 de maio co Réquiem de Verdi, será o último baixo o mandato do director peruano xa que o actual xerente da Orquestra Sinfónica de Galicia, Oriol Ponsa, será tamén o futuro director do certame. Alén destes cambios estruturais, esta edición do festival estreará unha versión inédita de O soño dunha noite de verán de Mendelssohn, representará o Don Giovanni (producción do Teatro di Tradizione de Macerata) e levará actividades puntuais do festival a diferentes localidades coruñesas (Rianxo, Ferrol, Carballo, Vimianzo e Betanzos, entre outras).

Los Justicieros loitan contra La Araña Blanca no seu primeiro disco

Xénero: Rock | 10 / 3 / 2010

Se nos fiamos do seu perfil no MySpace o grupo Los Justicieros son das soleadas praias de MALIBÚ, pero fiando un pouco máis fino veremos que en realidade ese lugar sitúase máis ben como un acrónimo de Malpica e Buño. A banda está formada por catro músicos “fans da Serie B, o Spaghetti Western e a cervexa máis barata” levan desde o ano 2007 soltando racións de rock surfeiro e garaxe dos sesenta por diversos escenarios. O seu debut discográfico foi no 2009 coa edición dun EP en vinilo de 7 pulgadas chamado ¡¡¡Waka Wakaaa!!! editado co selo Freeky Dicky Records. Agora veñen de recoller eses temas e engadirlle outros novos temas ata os dez que conforman o CD Los Justicieros contra La Araña Blanca un álbum cheo de enerxía, diversión e sons evocadores das décadas nas que a Serie B e o surf estaban no seu máximo apoxeo. O disco foi gravado nos estudios Circo Perrotti de Gijón.

Un ciclo de concertos achegarálle a música galega aos programadores

Xénero: Miscelánea | 9 / 3 / 2010

A Axencia Galega das Industrias Culturais, en colaboración coa Asociación Galega de Empresas Musicais e a Asociación Galega de Produtoras Fonográficas (Agaphono) iniciará o vindeiro 18 de marzo o ciclo ST Música Presente. Esta iniciativa, que se desenvolverá no Salón Teatro de Compostela, quere servir para dar a coñecer grupos e solistas do país entre "programadores culturais, promotores de festivais e certames de música, distribuidores, prensa especializada e demais axentes culturais". Nunha primeira xeira poderán seguirse ata finais de abril seis actuacións, a cargo de Anxo Lorenzo, Emilio Rúa, Álvaro Vieito Cuarteto, Ophiusa e Bellón Maceiras Quinteto.

Vigo será a sede da Rede Europea de Orquestras Folk

Xénero: Folk | 9 / 3 / 2010

A escola de música tradicional E-Trad de Vigo será a base permanente da Rede Europea de Orquestras Folk. Este proxecto, do que fai parte esta entidade coa Orquestra Sondeseu e mais a orquestra homónima, pretende potenciar este tipo de formacións e desenvolver un circuíto estable de actuacións. Organismo como a Academia Sibeliys de Helsinki e mais a asociación Artemotiva de Turín anunciaron xa a súa intención de tomar com modelo a orquestra viguesa para desenvolver formacións semellantes. Para o vindeiro ano, Vigo acollerá o primeiro encontro da rede.

O Encontro Galego de Música Xove reúne mañá cen grupos

Xénero: Miscelánea | 5 / 3 / 2010

Actuacións ao vivo, obradoiros, concursos e contactos profesionais entre grupos e axentes. Esta é a proposta do Encontro Galego de Música Xove que se celebra mañá sábado no Instituto Rosalía de Castro de Compostela. O evento, que pretende achegar oportunidades aos novos artistas do país, fechará con concertos de pequeno formato a cargo de Elanor, O Leo i Arremecaghona, Jane Joyd, Baldosa Amarilla e Silvia Penide. Segundo anunciou o director xeral de Xuventude e Voluntariado, Ovidio Rodeiro, o encontro inicia unha liña de traballo deste departamento encol da mocidade e a música. O pasado ano celebrárase, co nome de Nsaio Xeral. I Encontro Galego de Música Emerxente, unha primeira edición deste evento no mesmo lugar.

Donatore di Groove publican o seu primeiro disco Dios es sixty

Xénero: Fusión | 4 / 3 / 2010 + VIDEO

Tras un primeiro EP de catro temas en 2005 e a súa exitosa colaboración con Juan Rivas co disco Un mundo feliz e a xira correspondente desde o 2007, a banda de acid-jazz Donatore di Groove ven de seacar ao mercado o que é o seu primeiro disco de longa duración. Dios es sixty (SUL Producciones, 2009) esta xa desde onte á venda en tendas e na rede e ofrece doce temas de composición propia e unha versión do tema central da película francesa Un hombre y una mujer (Un homme et une femme, 1966), icona da época á que se refiren no título do álbum. Os Donatore di Groove fórmanse como grupo en Vigo no 2002, en base a integrantes da banda Cinnamon Gum, o cuarteto está actualmente formado por Iván Salgado, órgano Hammond; Isaac Garabatos, guitarra; Jean Marc Van Loo, baixo e David Outumuro, batería. A súa pouco común proposta musical baséase nun son “retro” de tintes jazz-funk, de tendencias sixties e con groove enérxico apoiado no característico órgano Hammond.

Martirio, Carmen Paris ou Berrogüetto participan no Música con Raíces da Coruña

Xénero: Folk | 4 / 3 / 2010

As voces de Mercedes Peón, Uxía e Guadi Gallego entre outras cantantes do país, abren o vindeiro domingo do ciclo Música con Raíces no teatro Rosalía de Castro da Coruña. O espectáculo Sereas, unha homenaxe ás pioneiras da música galega inicia un programa que contará con nomes tan destacados como Carmen Paris (o vindeiro día 25), Martirio, Luar na Lubre, Simphine Dana, Berrogüetto e mais Carlos Núñez.

Anxo Lorenzo pasa do eléctrico ao hindú

Xénero: Fusión | 3 / 3 / 2010 + AUDIO

Tirán a parroquia de Moaña da que é orixinario, sérvelle a Anxo Lorenzo de título para o seu debut discográfico en solitario. O ex-membro do grupo vigués Spíritu 986 abandona nesta nova andaina a fusión da gaita coa música electrónica e presenta once temas completamente acústicos. No entanto, e segundo explica o autor non renuncia a "buscar sons diferentes e a experimentar coas posibilidades da gaita, empregándoa en novas escalas ou con recursos pouco empregados". Dentro desta vontade experimental, no seu primeiro disco atopamos desde un vals venezolano ata temas nos que a gaita se mestura cos sons hindús. Entre os colabores, nomes como Pancho Álvarez, Kathryn Tickell, Luís Peixoto ou o colectivo Om/Off acubillan este lanzamento.

Arrinca a temporada de festivais en Galicia

Xénero: Miscelánea | 2 / 3 / 2010

O Festival do Norte deu a onte o cartel completo das actuacións que se poderán ver en Vilagarcía entre o 30 de abril e o 1 de maio. Los Planetas, Nada Surf, ou We are standard son algúns dos 16 grupos que pasarán polo escenario desta consolidada cita. Antes, os interesados no rock sinfónico teñen unha cita no Coliseum da Coruña. Entre os días 1 e 3 de abril, o Finisterrae Festival achegará dez conxuntos especializados en Rock Sinfónico, con nomes coma Premiata Forneria Marconi, Pendragon ou Steve Hackett Band entre outros. E dez días antes, na mesma cidade, a primeira edición do Endland Experience achegará a Expocoruña unha selección do mellor hardcore, punk e metal internacional. Strung Out, Caliban, ou No Children son algúns dos conxuntos que participarán no evento o vindeiro 20 de marzo.