MeGA

Kalandraka edita o drama do arrabaldo de Charleston composto por George Gershwin

Xénero: Jazz/Blues | 21 / 5 / 2008

A nova entrega da colección de ópera para ”primeiros oíntes” de Kalandraka ofrece una oportunidade de achegar aos máis cativos a obra de George Gershwin e as interpretacións de Ella Fitzgerald e Louis Armstrong. “Porgy and Bess”, ópera que mestura as técnicas orquestrais europeas co jazz e a música folk estadounidense, estreouse en 1935, dous anos antes de morrer o compositor. Na obra cóntase a historia dun home discapacitado que trata de salvar á súa amada da influencia dos homes máis perigosos dun barrio de Charleston, en Carolina do Sul, na década de 1930. O libreto está adaptado por Joan de Déu Prats e conta con ilustracións de Daniel Jiménez. O CD inclúe cinco dos temas entre os que están o coñecido “Summertime” e “My man`s gone now”.

Michel Camilo e Eddi Palmieri son os principais reclamos do Festival de jazz de Ourense

Xénero: Jazz/Blues | 6 / 5 / 2008

O final deste mes de maio terá como banda sonora o jazz. Se esta fin de semana coñecíamos o programa dunha nova xeira do Imaxina Sons, onte deuse a coñecer o cartel da duodécima edición do Festival Jazz de Primavera de Ourense que comeza o xoves. Unha cita que contará coa presenza de Michel Camilo e Eddie Palmieri, que suman entre os dous unha ducia de Grammys e son os principais reclamos. Pero non son os únicos, Jorge Pardo, o cuarteto Arguy ou o trompetista Randy Brecker estarán por Ourense neste certame que se prolonga ata o 28 de maio.

O festival de Vigo Imaxinasons abrirase cun concerto de Clunia Jazz

Xénero: Jazz/Blues | 5 / 5 / 2008 + DOCUMENTO

A celebración do 25 aniversario da formación coruñesa Clunia Jazz é un dos pratos fortes que este ano presenta o Festival de Jazz de Vigo Imaxina Sons na súa cuarta edición. O festival estará presente en diferentes espazos da cidade e desenvolverá diversas actividades paralelas durante once días entre o 26 de xuño e o 6 de xullo. Este festival é unha iniciativa do Concello de Vigo que naceu co obxectivo de dar cabida ao jazz realizado en Europa, á marxe de condicionantes comerciais, apoiando especialmente aos músicos que realizan á súa actividade no ámbito galego asemade. De aí que ademais da extensa lista de artistas estranxeiros como Wayne Shorter, entre outros, tamén estean os de formacións de artistas do país como Clunia Jazz, Terela Gradín, Lucía Martínez ou Paco Charlín. Vinte actuacións, un ciclo de cine, conferencias, clases maxistrais e unha exposición fotográfica conforman o programa presentado o pasado mércores, 23 de abril.

Sete concertos co jazz máis aperturista no ciclo da Fundación Barrié

Xénero: Jazz/Blues | 31 / 3 / 2008

O vindeiro 5 de abril dará comezo na Coruña a décimo terceira edición do Ciclo de Jazz da Fundación Pedro Barrié de la Maza que distribuirá sete concertos entre A Coruña e Vigo ata o 8 de maio. O programa desta edición está centrado na cualidade aperturista do jazz e ofrece, como é habitual, a actuación de figuras de primeira liña internacional como John Zorn, co seu novo proxecto Carte Blanche, o pianista McCoy Tyner Trio con Joe Lovano ao saxo tenor, Richard Galliano e outros artistas. Ragas xudeas, boggie woogie, soul, flamenco, afro, blues, stride, pop e bossa-nova estarán presentes nos conciertos desta nova edición que pechará en Vigo a actuación de Pepe Habichuela & Dave Holland Sextet. Na Coruña os concertos terán lugar no Palacio da Ópera, e en Vigo no Teatro Salesianos. A entrada a todos será de balde previa retirada de invitacións.

Abe Rábade reivindica a actualidade de Rosalía en chave de jazz

Xénero: Jazz/Blues | 11 / 3 / 2008 + AUDIO + IMAXES

Desde hoxe estará nas tendas o disco “Rosalía 21” (Falcatruada) saído do espectáculo multimedia co mesmo nome que se presentou no Teatro Mella da La Habana o pasado 23 de febreiro. O espectáculo, dirixido musicalmente por Abe Rábade e literariamente polo poeta Anxo Angueira, proporciona unha visión contemporánea da poesía de Rosalía de Castro (1837 – 1885). O disco conta con dez temas con textos da poeta compostelá e un corte extra cun fragmento do prólogo de Cantares Gallegos. A declamación dalgunhas das obras de Rosalía na voz de Angueira vaise mesturando coa música en chave de jazz composta por Rábade e a poesía cantada por Guadi Galego. O proxecto procura “unha renovación estética da temática rosaliana adaptada aos novos tempos:melodía, timbre, harmonía e ritmo.” No disco participan Abe Rábade (piano e composición), Anxo Angueira (voz recitada), Guadi Galego (voz), Jesús Santandreu (saxo tenor), Nelson Cascais (contrabaixo) y Bruno Pedroso (batería).

A Fundación Barrié organiza o seu XIII Ciclo de Jazz

Xénero: Jazz/Blues | 28 / 2 / 2008

Serán sete concertos gratuítos, catro na Coruña e tres en Vigo. A Fundación Barrié inicia o vindeiro cinco de abril o seu XIII Ciclo de Jazz, que se desenvolverá ata o vindeiro oito de maio. John Zorn, MacCoy Tyner, Richard Galliano & Tangaria Quartet, Miriam Aida, Rhoda Scott, David Kikosky e Pepe Habichuela son os artistas que participan nesta edición. O diálogo do jazz con música coma a bossa nova, o blues, o soul ou o flamenco é o eixe do programa.

Volve o blues en galego no novo disco de Víctor Aneiros

Xénero: Jazz/Blues | 21 / 2 / 2008 + VIDEO + AUDIO

O bluesman Víctor Aneiros e a súa banda comezan este venres 22 e sábado 23 na sala B-Flat en Matosinhos (Portugal) a xira de presentación do seu novo traballo “Heroe secreto”. O disco, editado polo selo vasco Gaztelupeko Hotsak, é o cuarto na traxectoria do grupo liderado polo guitarrista e cantante ferrolán. Como xa fixera no seu anterior traballo Aneiros volve cantar blues en galego. No disco, as letras do ferrolán conviven con outras de autores clásicos, como Rosalía de Castro (Soia), e contemporáneos, como o eumés Ramiro Fonte (Na barra). Para presentar estas e outras cancións, a Aneiros, sobre o escenario, acompañaranlle os seus músicos de sempre: Xacobe Martínez (contrabaixo), Manolo Gutiérrez (piano) e Marcos Sánchez (batería). A presentación en terras galegas do disco será na sala Breogain de Vigo o vindeiro 29 de febreiro.

Lugo aposta por nomes coñecidos para o seu Festival de Jazz

Xénero: Jazz/Blues | 7 / 11 / 2007

O Círculo das Artes de Lugo parecerá, do 12 ao 17 de novembro, un club de jazz de Nova York. Principalmente porque as bandas de jazz neoyorquinas máis destacadas estarán na XVII edición do festival de Jazz. O vocalista e compositor Sachal Vasandani, John Scotfield e Joe Locke son algúns dos nomes que destacan do cartel desta edición no que se investiron preto de 80.000 euros. Canda o Círculo, o Club Clavicémbalo, a Escola de Maxisterio e a de Veterinaria serán os escenarios dos concertos.

Máis información no web do festival e na nosa hemeroteca

Falece Carlos Asorey, propietario do Club de Jazz Dado Dadá de Santiago

Xénero: Jazz/Blues | 24 / 10 / 2007

Despois dunha longa enfermidade onte faleceu en Santiago Carlos Asorey, propietario do club de jazz Dado Dadá, un dos locais de jazz máis antigos de Galicia e en funcionamento. Hoxe despídense deste home moi querido moitos músicos, magos e actores que pasaron polo escenario deste mítico local que rexentaba coa súa muller Carmen Eixo. Fai dous anos o club celebraba o seu 25 aniversario xa que o 16 de Febreiro de 1.980 abría as súas portas o Jazz Club Dado Dadá na Rúa de Alfredo Brañas de Santiago. Dende aquela pasaron máis de 9.000 noites de jazz, flamenco, canción de autor, pop, rock, teatro, humor, maxia e tertulia animadas e organizadas por Asorey e a súa dona. Neste tempo polo seu escenario pasaron algunhas das figuras máis interesantes do panorama cultural nacional e internacional e moitos músicos célebres que pasaron pola capital visitaron o local e mesmo participaron con concertos improvisados e jam-sessions.

Máis información en El Correo Gallego e o noso Tema do día sobre 25 Aniversario do Dado Dadá

Carlos Childe Troupe abre con “Cooking Melodies” a colección de Blues & Jazz do selo PAI

Xénero: Jazz/Blues | 10 / 10 / 2007 + IMAXES + VIDEO

Os coruñeses Carlos Childe Troupe editan co selo PAI o seu primeiro disco “Cooking Melodies”, gravado no estudio Casa de Tolos coa produción artística de Segundo Grandío. A discográfica abre con este disco, e máis coa reedición de “15 years old blues” de Miki Nervio & The Bluesmakers, o seu apartado de Blues & Jazz, que levaban tempo desexando ter. A formación encabezada por Childe e na que tamén están Santi Roma, Víctor Sánchez e os irmáns Juan e Luís Tinajero presentan neste menú una ducia de temas de blues e swing nos que a desgarrada voz de Childe entra nos estándares destes xéneros con versións de clásicos como “God bless the child” ou “Summertime blues” entre outros. Tamén colaboran neste disco os metais dos Mañufe Horns (Pablo Casal, Jose Pérez e David Fernández “Michi”) e os teclados de Mr.D de Moon Cresta. “Cooking Melodies” presentarase o sabado día 27 de Outubro ás 19:30 horas na Fnac de A Coruña.