CORREO
RSS
Ti estás aquí > Inicio / Xéneros / Alternativa
Música Alternativa
O Festival Sinsal 11 arrinca en Compostela
Xénero: | 2 / 4 / 2013
O Teatro Principal de Compostela abrirá, o vindeiro 1 de maio, a programación do Festival Sinsal 11. A cita de referencia dos sons alternativos en Galicia inicia a súa nova edición cun concerto do grupo dinamarqués Efterklang, que presentará o seu disco Piramida, lanzado este mesmo ano. En vindeira datas iranse dando a coñecer as novas citas deste evento.
Movementos subterráneos
Xénero: | 3 / 10 / 2012
Quen dixo que na música galega todo era folk? Punk, cancións humorísticas, sons industriais, electrónica. En decembro de 2010 o disco Galicia Bizarre, unha escolma de grupos do máis estraño que existe no panorama musical galego. Non contentos co grande éxito da iniciativa, os seus promotores recuncan este outono cun segundo volumen que demostra a variedade e a vitalidade da escena alternativa galega.
Dous proxectos musicais colectivos chaman á colaboración do público
Xénero: | 10 / 4 / 2012
Reunir 2500 euros antes do 14 de maio para tirar unha edición de 525 copias en vinilo. Esta é a proposta que fan os grupos que queren gravar Galician Bizarre II, o segundo compilatorio de bandas bizarras do país. Os que fagan a súa achega, a partir de 10 euros, poderán facerse con copia do disco e mesmo cun concerto de Rafa Anido, segundo a contía. Canda a eles, tamén a Orquesta Metamovida, un proxecto que reúne músicos de diferentes conxuntos vigueses comaCró!, Unicornibot, Why Go ou Holywater entre outros, aposta por este formato de financiamento. A súa intención é publicar un disco que recolla os temas de estilo post rock que estiveron interpretando en actuacións en directo ao longo dos últimos meses, para o que tentan reunir 2.000 euros.
O Festival Sinsal chega á súa décima edición
Xénero: | 4 / 4 / 2012
Os vindeiros 14 e 15 de abril, o MARCO de Vigo acolle o comezo do X Festival Sinsal. O evento celebra a súa década de vida dun modelo de organización máis participativo inaugurando o Club Sinsal, que se abre a disciplinas para alén da música. Deste xeito, contarase cun espazo para a proxección de filmes caseiros en formato Súper 8 ou cunha área para revelado fotográfico e experimentación electrónica. Canda a isto, mantense a sección dedicada á infancia, e no Escritorio Sinsal reuniranse escritores coma María Xosé Queizán, Agustín Fernández Paz, Rexina Veiga e Fran Alonso.
Unicornibot lanza disco e inicia xira de presentación
Xénero: | 16 / 3 / 2012
O web Bandcamp acolle desde onte o novo disco da banda pontevedresa Unicornibot. Dálle! presenta dez temas instrumentais con doses de rock industrial. O álbum, para alén de poderse escoitar íntegro na rede, pode mercarse en formato dixital e terá, a partir do 22 de marzo, tamén unha edición en vinilo serigrafiada. O disco gravouse en directo no estudio Estudio Brazil de Madrid e ve a luz da man da colaboración dos selos Matapadre, Radix Records, Bloody Dirty Sanchez Productors, Chingaste la confianza e Odio Sonoro.
O ciclo Galicia Importa achegará cinco novos concertos
Xénero: | 6 / 9 / 2011
A Consellaría de Cultura presentaba esta mañá a última xeira do ciclo Galicia Importa, que achegará ata o noso país ao longo do vindeiro outono, cinco concertos. Patrick Wolf (13 de outubro en Vigo), Bonnie ‘Prince’ Billy (22 de outubro na Coruña), Adam Cohen (27 de outubro en Compostela), Aloe Blacc (6 de novembro en Compostela) e Bettye Lavette (8 de novembro na Coruña) son as incorporacións confirmadas no programa. O titular de Cultura, Roberto Varela, sinalou no entanto que haberá máis actuacións antes de que acabe o ano.
O II Festival Vibracional TPS leva a música improvisada ao Gaiás
Xénero: | 23 / 5 / 2011
Dous anos despois da súa primeira edición, o Festival Vibraciona TPS, dedicado á música improvisada, volta ao noso país. A Cidade da Cultura acollerá o vindeiro 4 de xuño as actuacións de Llorenç Barber, Paolo Angeli e Germán Díaz, rt2dV, Montserrat Palacios ou a Orquestra de Música Espontánea de Galicia entre outras. Ademais, proxectaranse pezas videocreación experimental de creadores galegos, e o ciclo minúsculo de "concertos para auriculares". A iniciativa xorde da colaboración entre a Cidade da Cultura e mais o Centro de Novas Tecnoloxias do Pico Sagro.
Sinsal organiza o primeiro encontro de enxeñaría cultural
Xénero: | 9 / 3 / 2011
AP-9. Enxeñaría cultural é o título do encontro que organiza o Festival Sinsal na Coruña os vindeiros 8 e 9 de abril. A proposta pretende explorar as últimas tendencias en xestión cultural atendendo a cuestións como a busca de financiamento para proxectos, as posibilidades das novas tecnoloxías ou o traballo en rede. De xeito paralelo, o Festival organiza unha extensión no garaxe de Expocoruña centrada en propostas musicais de carácter experimental. Diva Dompé, Fm Eiheit e Massimo Pupillo, Live Footage ou Raime son algunhas das propostas que se poderán contemplar ao vivo no evento.
A crise sonora
Xénero: | 15 / 2 / 2011
Hai apenas unha semana, a banda Ataque Escampe anunciaba, mediante un comunicado a súa intención de “decrecer”. Deste xeito, os membros do grupo encargaranse da produción e da xestión integral do que será o seu cuarto disco. Segundo explicaban, son tempos duros para os proxectos musicais en Galicia, fundamentalmente por mor da crise e mais polas mudanzas nas políticas públicas de apoio ao sector. “Pensabamos que o noso proxecto corría á marxe das institucións e non era así”, sinalan no seu comunicado. Indagamos as causas que están detrás destas mudanzas do sector cun dos seus membros.
Mercedes Peón presenta o seu cuarto disco SÓS
Xénero: | 15 / 12 / 2010
…---… SÓS en código morse, é cuarto disco de Mercedes Peón e un punto de inflexión na súa carreira. Cos seus discos anteriores conseguiu situarse na escena world music a nivel europeo e co novo traballo, editado por Fol do grupo BOA, dá un paso máis como produtora, compositora e cantante, traspasando as fronteiras das músicas de raíz para situarse na vangarda musical. O tratamento do acústico como eléctrico e do eléctrico como acústico sitúana nunha esfera onde a súa proposta pode ter cabida en festivais como Sonar, Coachella ou Burning Man. Creado, tocado, producido e mesturado por ela mesma nos seus dez temas ...---..., é un exercicio de microcomposición, onde o resultado final, enténdese como unha superposición de capas e unha investigación incansable de novas formas de expresión. A artista foi elixida polo comité do Womex para presentar alí este traballo. O disco preséntase como unha edición limitada en caixa metálica serigrafada e distribuirase en Francia, Alemaña, UK, Bélxica, Holanda, Luxemburgo, Portugal, Dinamarca, Suecia, Noruega, Austria, Italia, Grecia e Xapón.
novidades discográficas
Galician Bizarre I-II
VVAA
Dálle!
Unicornibot
SÓS
Mercedes Peón
REPORTAXE
Guías para construír unha paisaxe
Data.Escoitar.org é unha iniciativa aberta que pretende recompilar a paisaxe sonora galega. Aprende cómo colaborar.
