MeGA

Falece o compositor Francisco Rey Rivero

Xénero: Coral | 23 / 4 / 2012

Considerado un dos principais impulsores do canto coral en Galicia, o compositor Francisco Rey Rivero falecía onte aos 83 anos de idade. No seu haber deixa o ter fundado agrupacións como a coral Casablanca, a Ureca ou a do Club Náutico de Vigo. Canda a isto, é autor dalgúns dos temas máis populares neste estilo, con temas como Perla antillana ou La sirena. O seu traballo valeulle premios como a medalla da Academia Galega de Belas Artes ou o premio Reconquista de Vigo, entre outros recoñecementos.

De Ruada vía exposición

Xénero: Coral | 17 / 9 / 2009

Resumir 90 anos de intensa historia musical non é sinxelo. Ata o vindeiro 27 de setembro no Edificio Simeón de Ourense podemos ver un exemplo de como abordar este traballo. Da man da discográfica Ouvirmos a exposición Sete voces para a Coral De Ruada achéganos á historia desta histórica formación da música tradicional galega.

¿Malos tempos para a lírica?

Xénero: Coral | 27 / 4 / 2009

Teñen feito xiras mundiais dignas dos Rolling Stones e levan ben máis tempo ca eles en activo (aínda que semelle imposible). A Coral De Ruada celebra neste 2009 o seu noventa aniversario en plena forma e, canda a ela, outras tres históricas formacións manteñen en activo o espírito de recuperación de música popular do comezo do século XX. Botamos un ollo na actualidade das corais galegas.

A Coral de Ruada celebra noventa anos cun feixe de iniciativas

Xénero: Coral | 21 / 4 / 2009

O 24 de xuño de 1919 nacía en Ourense a histórica Coral de Ruada. A formación celebra agora os seus noventa anos cun bo feixe de actividades que se desenvolverán ao longo de todo o ano da man da discográfica Ouvirmos. Por unha banda, o selo reeditará o libro que recolle a viaxe que o coro fixo por Andalucía en 1927 e recuperará as primeiras gravacións da formación nun disco conmemorativo. En setembro, o edificio Simeón de Ourense acollerá unha mostra na que se poderá contemplar o traballo gráfico de diferentes creadores arredor de Ruada, así coma un documental sobre a traxectoria do grupo e diferentes contidos didácticos. Visitas guiadas e mais a celebración do III Certame Internacional de Coros De Ruada no mes de xuño completan o programa previsto.

Arranca en Culleredo o ciclo Grandes coros de ópera

Xénero: Coral | 13 / 3 / 2009

A Antiga Universidade Laboral de Culleredo acollerá esta noite un concerto singular no que participarán uns 180 músicos. As corais polifónicas El Eco de la Coruña, o Liceu Casino de Vilagarcía e a Orquestra Sinfónica de Melide ofrecerán a primeira dunha serie de galas líricas que interpretarán pezas de Verdi como Nabucco, Aída, Il Trovatore, La Traviata ou Macbeth. O proxecto chámase Grandes Coros de Ópera, e con el a Sinfónica de Melide pretende estender a actividade musical á provincial. A Coruña, Ferrol e Santiago son algunhas das localidades polas que xirará o espectáculo que conta cunha achega de 65.600 euros da Deputación da Coruña.

A primeira partitura do himno galego é de 1906

Xénero: Coral | 18 / 2 / 2008

Unha adaptación para banda arranxada por Felipe Pereira en 1906. Esta é a partitura máis antiga que se coñece do Himno Galego, e posiblemente, a que se empregou para a estrea oficial da peza na Habana. A investigación para a mostra “A Nosa Voz”, que se pode ver estes días na igrexa de San Domingos de Bonaval, Compostela, tirou a luz recentemente este documento, que se conservaba no arquivo da Banda Municipal da capital cubana.

Ouvirmos recupera gravacións do coro Cantigas da Terra nos anos vinte

Xénero: Coral | 8 / 2 / 2008

A discográfica Ouvirmos presenta estes días un novo disco-libro da súa colección A Tiracolo de gravacións históricas. Neste caso son as interpretacións rexistradas entre 1921 e 1928 polo coro coruñés Cántigas da Terra, que leva en activo desde 1917. Neste case século de historia, iniciada interpretando o himno galego, reuniron un variado repertorio e o arquivo coral mellor conservado. Algunhas desas pezas están agora restauradas e incluídas no número 14 desta colección: "Estampas coruñesas 1921-1928". Neles recollen a primeira gravación do clásico Negra sombra; o Himno a Galicia, que contribuíron a afianzar; e O quer que lle quer, entre outros fitos.

Rogelio Groba e Rudesindo Soutelo cobran os dereitos de autor do himno galego oficial

Xénero: Coral | 21 / 12 / 2007

Todo o mundo sabe que o himno galego foi composto por Pascual Veiga en 1890. Pero o que escoitamos nos actos oficiais é a partitura de Veiga arranxada por Rogelio Groba, despois dun encargo que lle fixo Xosé Luís Barreiro en 1985, cando era vicepresidente da Xunta de Galicia (e que figura nos anexos á Lei de Símbolos). Sucede que Rudesindo Soutelo editou eses arranxos en “Arte Tripharia”, a súa editorial, e así o fixeron constar na SGAE. Iso implica que cada vez que se interpreta o himno oficial, tanto Groba como Soutelo, cobran. Rudesindo Soutelo, nunha entrevista realizada por este medio en 2003, explicou que os ingresos pola interpretación do Himno van entre 3.000 e 6.000 euros anuais porque “aínda que se interprete moito, non se declara”.

Máis información en La Voz de Galicia e sobre os dereitos na nosa hemeroteca. Ademais, consulta o noso tema sobre o himno

Dezasete localidades acollerán os encontros de sesenta e dúas corais do país

Xénero: Coral | 5 / 10 / 2007

A Consellaría de Cultura e a Federación Coral Galega organizan un programa de encontros de corais para dar a coñecer o traballo musical que elaboran estas formacións musicais no noso país. As actuacións comezarán mañá na Casa da Cultura do Milladoiro, no concello de Ames e durarán até o 23 de decembro. Os concellos nos que haberá actuación son os seguintes: Brión, Carballo, A Coruña, Ferrol, Narón, Noia, Outes, Sada, Santiago de Compostela, Vimianzo, O Rosal, Oia, A Gudiña, Vigo, Vilaboa e Ourense. En total serán 62 as corais participantes nas actuacións que se desenvolverán en 17 localidades. Nos eventos a coral local encárgase de darlle a acollida ás corais visitantes.
Máis información na Consellaría de Cultura e Deporte

Camerata ad Libitum organiza en Pontevedra un curso de dirección coral e canto

Xénero: Coral | 19 / 6 / 2007

O coro de cámara “Camerata ad Libitum” de Pontecesures anuncia a convocatoria da décimo oitava edición do Curso de Verán de Dirección Coral, Canto e Técnica Vocal que vai ter lugar na cidade de Pontevedra do 1 ao 15 de Agosto de 2007. O curso constará de diferentes actividades coma concertos, seminarios, canto común, etc. ademais das clases de Dirección Coral e Técnica Vocal propiamente ditas e un Obradoiro especial ás ordes dos 2 directores convidados. A reserva e solicitude de praza estará aberta desde a semana que ven ata o 30 de xuño. A matrícula farase do 1 ao 10 de xullo. Todos os cursos están destinados a cantores e directores ou futuros directores de coro, profesores o estudantes de canto ou música en xeral e todas as persoas afeccionadas que desexan iniciarse ou profundar no campo do canto coral.

Máis información en Camerata