|
El defínese como “xornalista por paixón e cu quente por filosofía”. Xavier Sanmartín non naceu en Galicia que naceu no País Vasco, pero pola súa implicación na vida -sobre todo musical- da comunidade xa é un galego compostelán máis desde hai moito tempo. Desde as ondas no seu programa La Ganzúa, da emisora compostelá Radio Obradoiro, desde a rede no revista musical do mesmo nome, e desde as páxinas de El Correo Gallego e O Correo Galego diríxese desde hai anos ó público traendo as crónicas e comentarios sobre a actualidade musical sempre cunha óptica de análise, crítica e reivindicación dos círculos independentes e menos apoiados da música. Polo seu programa de radio levan pasado nos catro anos que leva no aire uns catrocentos grupos galegos, unha aposta que tamén se reflicte no apoio á independencia musical fronte ás discográficas e unha oposición ás actuais teses da Sociedad General de Autores y Editores. A recente campaña do 2º Día da Música Independente no pasado 11 de xuño tivo, segundo Xavier, unha espectacular acollida, de tal xeito que a páxina web feita para ela (www.musicaindependiente.org) chegou a ter nun só día 15.607 visitas.
Xavier diversifica a súa actividade a tódolos campos da creación e da comunicación que pode, “fago relatos, curtas, guións de tele, de cómics, música, teatro e tamén teño feito MOITO o ridículo, pero sempre… sen subvencións”. Desde xuño coordina, “(des)fago de coordinador”, di el, do I Taller de radio da emisora Radio Obradoiro. Xunto a Marisol Blanco dirixe a revista musical La Ganzúa.net que ten unhas seiscentas visitas diarias logo de sete meses na rede. A revista insírese no formato do ezine, o magazine electrónico, e está editada pola Asociación Cultural Sempre Cine, sen axudas nin subvencións ningunhas. A través dela tamén fan coloquios e organizan proxeccións, aparte de botar unha man nas Xornadas de Cine e Vídeo de Galicia, as Xociviga.
Entre os seus proxectos máis recentes está a elaboración dunha “modesta antirrevista” de nome Agata para a que conta coa colaboración de Marisol Blanco, Jesús Cortiñas “e outros elementos politicamente incorrectos”. Do resto dos seus proxectos Sanmartín prefire non falar moito, “son dos do movemento pero andando, ¡Hai moito berro de máis nestes tempos!”
La Ganzúa.Net
|
RSS
http://www.internautas.org
