Os favoritos de María Yañez

Desde a súa aparición na primavera do ano 2001 o portal Bravú.Net ven sendo un dos catalizadores da cultura galega máis alternativa e activa. Case todos os que pasaron por esta sección coincidiron en sinalalo como unha das súas páxinas web favoritas, convertindoo así nun dos medios de referencia do noso país. O que moitos non coñecen é a xente que está detrás de Bravú, facendo que se actualice “cando se precisa” como di no seu lema. María Yañez é a persoa que leva aí desde os comezos coordinando e elaborando os contidos. Esta luguesa “queixase” de ter dedicado catro anos da súa vida a estudiar xornalismo en Santiago para logo rematar traballando de porteira, claro que que cando o portal se chama Bravú.Net a cousa non semella ser tan mala.

Ademais de este traballo como “porteira virtual” María traballa dun tempo a esta parte no departamento de desenvolvemento de proxectos da productora Continental, facendo un pouco de todo e preparando varias cousas para o audiovisual das que de momento prefire non falar moito pero das que de seguro que teremos novas próximamente. A creatividade desta xornalista xa pasou por outros traballos anteriores ed no seu curriculum , “ridiculum vitae” segundo ela, aparecen nomes como o de outro portal de referencia “Vieiros” e o xornal da súa cidade na tal, “El Progreso” de Lugo, “medios que consulto a diario con cariño e interese”, asegura María. Esa creatividade levaa a axitar as súas neuronas en tódolos proxectos que poida, ela di que o que quere facer de maior é “montar un bar ou unha revista feminina tipo Cosmopolitan para mulleres nacionalistas”, aínda que cando o pensa un pouco esta última parécelle unha idea pelegrina e opta polo de montar un bar,”definitivamente, creo que é mellor idea”, di ela.

María di que usa Internet “máis do que debera”, xa que ten que usalo para o seu traballo necesariamente e ademais para outras cousas que ela enumera “Para que me manden correos que logo esquezo contestar, para buscar teléfonos (moito mellor que o 1003), para baixar música polo morro (un minuto de silencio por Audiogalaxy), para ler a prensa, para rajar nos foros baixo múltiples seudónimos, para falar polo messenger con outros sufridos colegas de profesión… Cando teño tempo gústame perderme a ver qué se atopa de novo por aí, pero estas navegacións sen rumbo cada vez son máis frustrantes. Desde que se inventou a tarifa plana ten menos gracia perder o tempo en internet. ” A de María Yañez é toda unha personalidade chea de imaxinación e retranca que de seguro que dará moito que falar no futuro, ademais do que da hoxe xa.