Os Favoritos de Marta Dacosta

Dicía o poeta ruso Vladimir Majakovskij que a arte non é un espello para reflectir o mundo, senón un martelo para bater nel, unha idea semellante manexa a viguesa Marta Dacosta cando di que procura escribir co corazón, “co firme propósito de revolverlle o estómago ao que se senta fronte aos meus poemas” Desde que en 1986 conseguiu o premio de poesía xuvenil do xornal A Peneira a súa actividade literaria foi continua, ela o describe como un estado de “permanente construcción literaria, sempre escribindo algún texto, aínda que sexa dunha forma esporádica e non metódica”. Froito desa continuidade foron outros premios como o do certame de poesía Rosalía de Castro de Cornellá en 1992, o premio O Grelo de 1993 polo poemario “Crear o mar en Compostela” e o González Garcés en 1995 por “Pel de ameixa” . Marta Dacosta é a primeira muller en ter recibido o premio Martín Codax coa obra “Setembro” en 1998, e o ano seguinte obtivo o accésit do premio Esquío con “En atalaia alerta”. Un curriculum como poeta que hai que completar coa súa actividade docente de profesora de lingua e literatura galegas no ensino medio.

Proximamente vaise publicar en Espiral Maior o seu último libro “As amantes de Hamlet”, un conxunto de poemas que xiran ao redor de figuras femininas e que nace da relación entre poetas e sucidio, “aínda que no libro aparecen moitas cousas máis como a mitoloxía como fonte de alimentación, pero tamén como creación propia, unha mitoloxía de orixe culta e literaria, e tamén popular e lendaria.”.

Considerada por algúns como destacada representante dunha xeración coñecida como “os poetas dos 90″, Marta Dacosta mantivo contacto con outros escritores da súa promoción durante a súa etapa de vida en Compostela, alí coñeceu a Rafa e Miro Villar, Estevo Creus, Chus Pato, Emma Couceiro e outros moitos que xa son coñecidos no mundo da poesía actual. Froito desta relación saíron distintas iniciativas, a más ambiciosa delas, e máis recente, a colección de poesía Letras de Cal, unha plataforma editorial para a publicación da obra de poetas novos que teñen difucltade para ser publicados nos cuces convencionais das editoriais. A avaliación posterior do resultado Marta calificaa como moi boa, ” neste momento hai xa varios títulos na rúa e a colección ten unha calidade notable”, asegura.