Os Favoritos de Alberte Permuy

Poida que haxa moita xente á que o nome de Alberte Permuy non lles diga nada, pero case todos poderán ter del un referente se lles dicimos que do seu estudio de deseño saíron logotipos tan famosos como o que identifica as identidades corporativas do Concello de Santiago, do Xacobeo ou da Orquestra Sinfónica de Galicia, entre outros, de feito ó seu estudio se lle debe a tipografía inspirada nos petroglifos que identifica a Galicia na publicidade promocional que a Xunta usa na súa publicidade turística. Estes símbolos comunicativos, recoñecibles pola ampla maioría da poboación son froito dun traballo de deseño que Alberte ven desempeñando desde fai máis de vinte anos. Permuy está recoñecido como unha das grandes figuras do deseño gráfico de España e a súa actitude de compromiso cultural coa identidade galega ven acompañando desde os principios o seu traballo. O seu estudio situado en Santiago desde 1983 rompeu o eixo Madrid - Barcelona de exclusividade na vangarda do deseño e situou na capital galega un novo referente deste sector a medio camiño entre a comunicación e a arte.

Alberte Permuy (Fene, 1955) comezou a súa andaina profesional en Barcelona, cidade na que estudiou deseño gráfico, en 1977, para despois trasladarse a Galicia instalando o seu estudio en Santiago en 1983, que despois convertería na empresa Permuy Asociados S.A. en 1992 onde, cun equipo multidisciplinar de deseñadores realiza proxectos integrais de comunicación visual, sendo as súas principais áreas de actividade a identidade corporativa, o deseño de marcas e logotipos, o deseño editorial, empresarial e institucional. Permuy, vencellado a través do deseño coas institucións autonómicas, participou desde os primeiros pasos do goberno autonómico nese proceso social de construcción do país aportando a creación de imaxes de identidade para as institucións e campañas de comunicación, sempre desde o seu criterio creador cheo de connotacións culturais da tradición galega co que conseguiu dar un lugar a esa tradición dentro dun proceso de modernización social. Sen dúbida Alberte é un dos responsables dese logro no país, ademais de converterse nun referente do deseño gráfico en Galicia e no resto de España. Seguindo nesa liña coa que leva máis de vinte anos de bo traballo agora mesmo Permuy ven de realizar un novo deseño de imaxe corporativa para empresa. Esta vez desde o marco do Plan Pyme da Sociedad Estatal para el Desarrollo del Diseño y la Innovación - DDI, un plan piloto que se está a realizar en catro comunidades autónomas e que pretende facer un labor de promoción do deseño entre as pequenas empresas, divulgando a súa importancia na xestión empresarial e a súa accesibilidade para as pequenas compañías. A través deste programa 25 empresas seleccionadas de cada comunidade reciben os servicios dun deseñador que analiza as súas necesidades en materia de deseño e procede a realizar os cambios que estima precisos. No caso de Permuy a empresa que lle foi asignada é unha firma de montaxes eléctricos de Santiago, CYMEL S. L. Despois desta experiencia Permuy está preparando unha obra que incluirase na exposición “Arte=Diseño=Arte” que organiza a Diputación de Zaragoza e que se presentará en febreiro e marzo do 2003. Non é esta aprimeira vez que Permuy ve as súas obras colocadas en exposicións ou galerías, con anterioridade ten participado de outras moitas mostras desde Berlín ata Vilanova da Cerveira con ocasión de exposicións de deseño galego, español ou europeo.

Atento ás tendencias máis vangardistas Permuy mantén na rede unha páxina de experimentación multimedia (http://www.albertepermuy.com) que forma parte do seu deambular nas discutidas fronteiras entre arte e deseño. Periodicamente actualizada con novas obras esta páxina web realizada en colaboración con Amaia Torre de Órbita Multimedia (http://orbitamultimedia.com) contén animacións e obras interactivas realizadas en Flash. A páxina foi seleccionada para a exposición “Pasión. Diseño español”, Berlín e Salamanca 2002.